近期最紅非九龍灣MegaBox莫屬，雖然有人鬧佢免費接駁巴士唔夠，但有樣嘢最合我「胃口」，就係食肆！佢哋搞咗個優惠，7月3日之前除咗星期六、日，夜晚喺指定食肆用恒生信用卡簽賬，食品全部半價呀！
有便宜唔使洗頸，我已經搶先試食兩間，御苑皇宴係比較高檔嘅酒家，400幾蚊嘅鮑魚減到200幾蚊，真係人一世物一世，食咗先計；至於百幾蚊嘅炸蝦都減到幾十蚊，仲有超大嘅蝦餃，但最搞嘢，係酒樓有芝士蛋糕Tiramisu！部長講原來佢哋專登喺五星級酒店撬咗個西餅大廚。我一路飲香片，一路食Tiramisu，夠晒fusion。
隔籬嘅自家客菜都夠搞笑，自稱「絕非正宗客家菜」，黃經理話佢哋改良過啲菜式，比較啱年輕食客。睇睇張餐牌，都算經濟，十幾蚊至幾十蚊一碟，半價真係超抵。佢哋嘅貴賓房仲要無最低消費，可以打牌㖭。其他半價商戶仲有魯一居、百樂門宴會廳、德興火鍋．海景軒、醉紅樓潮州菜、和光鐵板燒日本料理、喜百合等。
逢周一至周四刊出