上個禮拜二，孫柏文同個獅子山學會支持者食晏。佢每年都會捐錢俾我哋，亦因為佢人生經驗豐富，所以上週二約佢出來問吓我哋有咩改進嘅空間。

除會務外，我都有問佢關於國家趨勢、世界大事。因為佢做嘅生意，除咗喺香港之外，喺大陸亦係極少數香港公司喺個行業做龍頭。佢做開門市，我問關於啲網上嘅對手，佢話啲對手喺香港都冇威脅，不過喺大陸，啲對手冇道德咁打。即啲客搵佢對手時，啲對手公然叫啲客去佢公司睇貨，睇好先返網上買。仲要以本傷人，零利潤咁打，甚至蝕住保貼啲客。

咁我話大陸信貸泡沫爆破，對手應該冇咁勇去燒銀紙。不過佢話就算收斂啲，都係持久戰。持久戰？即係要資金囉？我問。佢話都算係。咁我知佢嗰間公司冇上市，所以就問：「咁會唔會考慮上市呢？不過我聽過你唔上市，係因為你同其他股東喺上市上有分歧。」

佢話，其實佢公司歷年來唔上市，最大嘅原因係冇資金需要。同埋上市，就要對啲小股東有承擔。我聽到，都覺得可惜，因香港股市，就係需要多啲對股東有承擔嘅人。不過聽完我就追問，不過你自己都話喺大陸要打嘅個場仗，都係一場持久戰，為保龍頭地位，可能真係要諗上市。

去到呢刻，喺商場打滾咁多年嘅佢冇出聲，我就轉向同我同行嘅獅子山學會同事白仲祺話：「頭先嘅對答，就係好典型以前喺鏡頭前做節目時嘅對答。哈哈！」點知翌日，我一開FaceBook，就見人分享一篇題為「代理競爭白熱化中原重啟上市」嘅新聞。睇緊段新聞時，同事白仲祺來短訊問：「施老闆今日咁樣宣佈，你話係咪因尋日個lunch？」我作為一個只理事實嘅人就答：「冇錯！百分百一定係同我哋食晏時諗到嘅！」

喺呢到祝望施永青同佢啲拍檔講得掂數，上到市同大陸人爭一日長短。因為睇網上紅磡站出面嘅melee，香港贏大陸之戰，香港最好打嘅，就一定係地產代理！

掌握財經生活資訊，即Like「蘋果ATM」fb專頁啦！
http://fb.com/appledailyatm