Mr.、蘇慧恩、天堂鳥Bop、Dear Jane及可嵐等，噚晚喺旺角麥花臣場館參與「Rock'n Life慈善音樂會」，Mr.演唱4首歌，現場反應熱烈。騷後佢哋接受訪問，講到10周年演唱會籌備工作，佢哋笑話：「我哋喺腦入面籌備緊，其實想有新歌，有音樂至可以諗其他嘢，但未有完成品，大家都忙，但好有心，有自己工作都會繼續寫歌夾band。我哋不停做緊演唱，但只有夜晚至有時間夾band，好似去返初出道時嘅MR.咁。」

蘇慧恩話最近拍完一部電影《真的你假的我》，第一次做女主角：「電影公司我有份開，角色同我自己完全唔同，好似年輕版元秋，講嘢粗聲粗氣，開頭係個好乞人憎嘅人，後尾識咗個男仔之後改變咗我嘅人生，不過就唔使講粗口，亦冇激吻，我本來好期待㗎嘛！」問到公司嚟緊再開會唔會繼續捧自己做女主角?蘇慧恩就話公司仲有其他人，最終要睇公司決策。

精選娛聞，喺晒《娛果》
http://fb.com/appledailyent