楊愛瑾（Miki）同老公永安太子爺郭永淳婚後恩愛，去年3月兩人嘅愛情結晶Luken出世，一家三口幸福滿瀉，兩公婆仲不時被影到行街拍拖，日前黃昏6點幾，打扮casual嘅Miki現身中環超市買餸，着粉紅連帽衛衣襯黑色外套，素顏、長髮、戴cap帽嘅佢樣子好pure，完全唔似師奶，兼有個快滿1歲嘅囝囝。

當日Miki同一位着西裝男先現身，由男友人負責推住架超市購物車，佢哋先去揀蔬菜水果，然後再去買肥牛，家庭主婦Miki好快手揀咗兩大盆肥牛，跟住戴有框眼鏡嘅郭永淳就嚟到會合，Miki同老公有商有量揀牛肉，晚上應該約咗大班好友滾一滾，之後佢哋去埋揀牛柳，似乎兩公婆都好鍾意食牛。

揀完牛肉後，一行三人再去睇海鮮，終於買齊一車餸菜，兩公婆好合拍分工合作，郭永淳一支箭行去停車場攞車，Miki同男友人就喺超市排隊畀錢，再到停車場會合老公返歸。

精選娛聞，喺晒《娛果》
http://fb.com/appledailyent