阿瑟王李國章前日第一次開港大校務委員會，好多人同花生友一樣，買定花生等睇阿瑟王橫掃千軍，將班港大校董殺個落花流水，點知最後冇料到，令好多人好失望。有對阿瑟王嘅任命一直感到十分「悲憤」嘅港大舊生話，好多中大舊生做晒花生友，陰陰嘴笑睇港大今次點死，佢叫中大生咪開心住，因為梁振英份中大校董推薦名單，據聞仲恐怖過港大。
話說之前傳過張志剛係中大校董真命天子，雖然佢否認，政府亦話唔評論，但據聞張志剛個名係「未死晒」，有港大舊生話：「橫睇掂睇，阿瑟王好過張志剛吓話？」但張志剛始終啱啱做咗教育資助委員會（UGC）成員，冇理由咁快唔撈入中大啩？

傳波叔羅范有份

咁CY份中大校董推薦名單，仲有乜可推薦人選？江湖傳聞話，排喺張志剛後面嘅仲有中策組首席顧問、CY頭號智囊邵善波，以及對教育政策仆心仆命嘅羅范椒芬，有港大友笑笑口同花生友講，「若然佢哋其中一個做中大校董，中大直情『深慶得人』，真係同阿瑟王入港大同級呀！」
亦有港大舊生同花生友講，傳聞中嘅中大校董推薦名單，又唔係個個名都係阿瑟王級數，佢聽聞另一個可能人選係前行會成員楊敏德，都算可以接受嘅人選，但佢仲係理大校董會主席，呢個係一大問題，所以呢個港大舊生都話，中大舊生聽完就算咪當真，「免希望越大，失望越大」。

花生友