民主黨單仲偕唔做議員，好多人都話該黨少咗個金融事務專家，影響議政能力。新丁議員甘乃威要惡補財經知識，黨內另一位對財經事務有認識嘅係涂謹申，佢𠵱家夠膽認做專家，原來都交過學費。
阿涂同八方講，不時有金融機構搵佢投資唔同金融產品，在公在私佢都有興趣認識各種金融產品內情，既可了解市場情況，又順便理財，有時會小試牛刀真金白銀投資㖭。阿涂話近年金融產品越嚟越複雜，佢係專業人士，聽完銀行或證券行職員講解有時都覺得幾惡搞，對部份產品有出奇咁高回報率更加疑惑，恐怕連財金官員都未必清楚，難怪一般小市民蒙查查。