黎耀祥、鄧萃雯同徐淑敏等主演嘅無綫新劇《巾幗梟雄》今晚首播，套劇由成龍拍廣告嘅霸王防脫洗髮液贊助。早前成龍發表奴才論，話香港人同台灣人太自由要管，仲大膽貶低國貨話內地電視機會爆炸，但成龍都接拍唔少內地廣告賺人仔，好似霸王都係國貨，所以難怪佢嘅言論惹人憤怒，連政府新聞處都抽起佢個道路安全駕駛宣傳片，《巾》劇好彩暫時未受影響。
《巾》劇演員都有聽聞呢單嘢，對於有傳話網民唔排除會抵制成龍，個個都話對套劇冇影響，黎耀祥話：「廣告同個劇係分開，偏激嘅人佔好少數啫。」但黎耀祥都心水清知道觀眾會受影響，所以佢都忍唔住講笑話：「唔知到時有冇第二條片播呢?」鄧萃雯就認為只係洗頭水廣告，冇關係。
「咪神」徐淑敏一身呼之欲出裝扮出席活動，佢話呢排肥咗，仲俾人叫佢做肥妹，於是的起心肝去減肥。佢講到成龍單嘢時話：「唔會有人罷睇，因為有雯女同黎耀祥喺度，已經有收視保證啦。」監製李添勝就為套劇撐成龍，又話聽講霸王幾好用，都想試吓。馮仁昭覺得現今社會用國貨都係好正常，真係難明成龍嘅一番言論。

私生活亂過台灣

另外，台灣人對成龍都好不滿，歌手大支仲喺部落格發表創作嘅歌曲《看不下去》，道出對成龍嘅不滿，又以十年前成龍同吳綺莉生下小龍女後話過「全天下的男人都會犯的錯」反諷刺，歌詞「你講台灣很亂，讚，有意思，台灣很亂，但干你屁事，你私生活比台灣還亂」都幾啜核。