飲茶同飲紅酒一樣，都可以係所費不菲嘅事。大家熟識嘅普洱被喻為可以飲嘅古董，陳年普洱茶餅近年可以炒到幾十萬元一個。愛品茗嘅資深賓架黃遠輝原來都收藏咗一個現值30萬元嘅1948年雲南紅印普洱餅。
講得上係銀行界茗茶大師嘅黃遠輝，早年曾經走去學茶。佢1992年以每個1,400元，買入六餅紅印普洱，飲用同埋送禮後剩低一餅，一直唔捨得飲。
所謂紅印，係包裝紙上嘅「茶」字以紅色標示，代表第一批出品，其後批次會以藍色與黃色印製。呢啲普洱之所以值錢，係未經炒熟便已壓成青餅，再經過長年累月的發酵成為黑餅，如紅酒一般，擺得越耐就越醇。

升值搞到無得飲靚茶

黃遠輝透露，佢仍然持有嘅呢個1948年茶餅只得8両重，1995年已經由1,400元，升至5,000元，轉眼至2000年就飆到5萬元，「舊年幫襯開嗰間茶舖，竟然出價30萬向我收番，但我都冇賣，賣咗就買唔返，自己唔會咁儍使多錢咁買。」佢𠵱家考慮將茶餅捐出去做善事，正等待慈善團體接觸。
普洱茶一向被喻為可以飲嘅古董，黃遠輝卻寧願佢唔識得升值，事關升值搞到佢呢位用家冇法嘆靚茶。佢𠵱家惟有買入好多青餅用作收藏，等過廿年先至飲。佢舊年都搵到一批紅印茶碎，以等同一個茶餅嘅重量計只需1,600元，指「平好多，但飲落就一樣！」

李華華
mailto:[email protected]