梁雪湄、黃芷晴同裕美等今日喺大埔為華星冰室開幕擔任嘉賓，梁雪湄話投資咗好耐：「西環、澳門、元朗間分店，我都有投資，但係因為成日唔喺香港，所以唔係成日可以出現。」

講到新店推出以佢命名嘅「雪湄奶凍」，擁有G奶上圍嘅梁雪湄話：「啲人成日話我動力，咁啱我哋有個甜品，啲茶餐廳來講淨係得我哋，所以就改咗個名叫『雪湄奶凍』。希望大家可以成日都嚟食，食完就好似BB咁凍齡。」佢仲笑言食呢個奶凍，可以保持到豐滿上圍：「日日黎食，可能好過食木瓜。」

講到佢凍齡嘅秘密，梁雪湄話：「因為我媽咪都生得好細個，所以有一半功勞係我媽咪嘅，加上自己又冇乜拍劇，可以成日飛去旅行個人開心，唔食煙有少蒲，加埋做運動，所以就好啲啦。」問到佢會唔會再拍劇，梁雪湄話：「長期留喺度就唔得，如果客串或者個劇本過癮都可以嘅。」

同場嘅黃芷晴就話飲食業比較難搞，但係自己都有意將網上首飾店變做實體店：「o依家都係新界區睇緊鋪，不過會叫爸爸投資，暫時仲係好初步嘅階段。」

講到嚟緊世界盃，佢就話會喺屋企做廚師，等爸爸睇波嗰陣有野食：「每屆都會陪住佢睇，不過希望佢唔好太攰。阿媽會鬧佢捱夜，我唔會，因為我唔想佢玻璃心。」

精選娛聞，喺晒《娛果》
http://fb.com/appledailyent