日本人氣女星木村文乃備受力捧，近年演出多部日劇及電影，今日竟然爆出已於11月11日閃婚嘅消息，其夫係一名年約30幾歲嘅演技導師，兩人本來屬師徒關係，如今結為夫妻，而明天滿30歲嘅木村文乃，今早都更新Instagram親自報喜。

木村文乃入行10年，憑住NHK晨早劇《小梅老師》彈起，前年參演人氣劇《錢的戰爭》及電影《愛的成人式》進一步上位，同年為日劇《Mother Game》擔正做女主角，5年內拍下逾30套劇集、20齣電影，並夥拍松坂桃李合演《Siren》及向井理嘅《擁有神之舌的男人》等。同時木村文乃都活躍網絡界，佢經常喺Ig分享烹飪心得，吸逾163萬人追隨，其事務所回應木村文乃目前並未懷孕，婚後會繼續在演藝圈發展，更開始為木村拓哉新劇《A LIFE~深愛的人~》開工。其實網上曾有流言指木村文乃曾經離婚，不過經證實只係流料。