韓國男星張根碩早排因為捲入逃稅風波，搞到要退出人氣綜藝節目《一日三餐──漁村篇》，冇得同車勝元佢哋齊齊煮嘢食。

雖然冇份煮，不過張根碩喺節目外似乎食咗唔少好嘢，噚日佢現身韓國金浦機場時，塊面好似脹咗。今次佢係飛去日本，為後日喺大阪開鑼嘅演唱會做好準備。

其實自從張根碩憑韓劇《原來是美男》走紅後，佢一直自稱「亞洲王子」，以為佢得把口，成日掛喺口邊啫，點知佢呢一日驚死方圓數百里嘅人睇唔到，特登拎住一個寫有「ASIAPRINCE」（亞洲王子）嘅機殼出嚟show，真係自戀到呢。