城城扮完美猴王之後，換咗個「牛魔王」Look，全身黑色兩邊膊頭有牛角，dancers就打扮成動物一樣。同Sunny鬥完舞就喺台上除外套，原來入面着住件紋身造型嘅衫，城城好輕佻咁問：「呢期興紋身，靚唔靚呀，犀唔犀利，驚唔驚先？」

之後城城換咗套紫色西裝，企咗上個6呎高台上面，舞台由一字排開變成三個「火車卡」，每個「火車卡」都會自轉，城城就企喺中間高台同dancers一齊跳舞。