六九反送中遊行聲勢之浩大有目共睹，由維園到金鐘人頭湧湧川流不息，行八小時未行完的紀錄前所未見，不論視頻或硬照的畫面都令人動容。主催單位公佈上街人數一百零三萬，向來習慣謙卑地報細數的警方，則指高峰時段有二十四萬，取兩極的中間，約莫都有七十萬；不料這時跳出一個受「香港發展中心」委託的雷姓科大經濟系前系主任，宣稱以「科學方法」計算，截至星期天下午五點前，得出累積六萬一千二百三十五的答案。嘩，係唔係呀，差距這麼巨大，很難不使人質疑此公工作期間是否瞌眼瞓，甚至根本發雞盲，我是雇主的話必定徹底調查，如有失職證據立即炒魷並且追討薪金。從前媽姐時代，事頭和事頭婆一天到晚慌死負責買餸的阿銀阿四打斧頭，苦於街市豬肉榮目不識丁，不能要求「死妹釘」出示單據，但我相信那些年的勞動階層比較老實，要呃也不過呃零頭，不像現在的奴婢狼胎，唉，果然世風日下啊。

心水清的圍觀者大概會好言規勸，呃數之嘛，睇開啲啦，總好過眼都唔眨指鹿為馬，唔通你唔記得咗前幾天法律界三千精英上街捍衞法治，翌日登上黨報頭條，駭然變成「法律團體紛挺修例」？臉皮沒有最厚只有更厚，無恥去到盡頭就是無敵，咁都得，數人頭數少十成八成簡直濕濕碎，起碼冇生按白造話市民空群而出歡迎移交逃犯。何況，這個雷某早有騎呢前科，兩年前為了表揚國內經濟欣欣向榮生活方便，大言不慚「我識得朋友叫雞可以用手機付款」，這種人講嘢你敢信幾多？