每逢星期日，唔少司局長都會「交功課」。乜嘢功課？咪就係藉住「網誌」，交代過去一周或未來有乜搞作囉。政務司司長張建宗咁勤力，又點會欠交？佢喺最新網誌提及，根據政府統計處最新公布嘅香港人口推算數字，香港整體勞動人口參與率50年後估計下跌至接近10%，可見勞動人口持續萎縮，勞動市場人才不足嘅問題迫在眉睫，預告由政務司司長領導嘅人力資源規劃委員會即將成立，全面檢視人力規劃。

其後佢又話一帶一路發展同政府推展嘅基建項目，創造大量就業機會，尤其需要大量機電工程人手，但業界卻長期唔夠人，需要年輕新力軍加盟，希望家長支持有志加入機電工程、工藝同其他技術行業嘅子女，佢話社會已經再冇藍領、白領之分，機電業等技術員大有作為，可以向上流動，絕對唔係「手作仔」。唔知佢呢番肺腑之言，影唔影響到家長們改變舊觀念？