伍詠薇今日現身書展，撐出新書嘅哥哥伍經衡(Richard)場。老公練海棠原定話會出現，但最終唔見影。

伍姑娘就解釋話：「老公負責揸車，因為下面塞緊車，又有遊行，所以佢都係唔上嚟！」伍姑娘又自爆呢期罰緊老公，話男人最好永遠都罰吓佢。

問到上次同老公去三亞旅行，係咪sweet晒？伍姑娘直認話係。對於助手跟埋去旅行，伍姑娘就話：「其實嗰次一早plan咗同助手佢哋一齊去，用腦諗吓啦，同助手慶祝都要一早安排o架！」

伍姑娘噚晚喺fb放咗張疑似真空攬貓貓相，記者今日問佢時，佢就好大反應話：「你點知呀，你哋班狗賊吖？其實冇乜特別，我喺屋企沖完涼，咁貓好少肯影相嘛，佢肯影咪叫助手影幾張，我有着衫o架！」記者笑佢獨守空房幃，問佢老公當時喺邊，伍姑娘講笑話：「我使咗佢去做外賣仔！」

伍姑娘話po咗呢張相後，朋友問佢係咪想出寫真，不過伍姑娘就話自己冇諗過，記者問佢係咪老公唔俾，伍姑娘就碌大眼話：「咩唔俾呀！」

問伍姑娘係咪已經收服咗老公，伍姑娘就笑話自己有阿哥喺度，叫記者唔好蝦佢。記者隨即問伍姑娘阿哥Richard，有冇向練海棠訓話？Richard就話：「冇嘢啦，人生有好多事，呢啲其實冇乜嘢，有冇同佢傾？一陣啦！」

活動完咗後，記者見到伍姑娘喺會展旁邊嘅君悅酒店，跳上老公揸嘅車離去。