應昌佑同兩歲零兩個月大嘅囝囝Travis、徐榮囝囝Karson，今日聯同《五個小孩的校長》小演員KhanNayab及ZahaFathima到太古城，出席一家意大利餐廳CIAK開幕。

9歲大嘅Karson由媽媽陪同到場，Karson受訪時，表現淡定，佢話爸爸徐榮要開工所以嚟唔到；講到8個月大嘅妹妹徐心怡（即係《愛‧回家》嘅馬家好），Karson即刻話好掛住妹妹。

父親節快到，Karson表示會畫心意卡送畀爸爸。問佢有冇興趣拍劇？Karson話：「好難講，因為我鍾意踢足球，我0依家係傑志U9，拍劇就麻麻。」

應昌佑同太太及兒子影相嗰陣，Travis拎住汽球郁來郁去，應昌佑笑道：「我媽咪話佢似足我細個，好鍾意掟嘢，掟到成車都係餅乾，又鍾意將個波掟去電視，所以湊Travis好攰，而且佢又高又重，0依家37磅，同齡小朋友都係20幾磅，我唔想佢大個咁高，6呎2、3就好，所以我心願係同Travis打籃球。」

應昌佑又指Travis有表演慾，會唔會畀Travis做童星？佢話：「唔會抗拒，有人賞識都可以。」拍劇好辛苦喎？應昌佑指：「唔辛苦，畀佢早啲試下都好，但要適可而止，不過首要係讀好書。」