無論演員定係歌手，除咗實力外，樣貌同身形都係佢哋嘅生財工具。現年29歲、一向有甜姐兒稱號嘅廖碧兒，最近被傳同緋聞男友陳豪甩拖，愛情失意、事業得意嘅佢，頻頻出騷賺錢，點知身形同荷包一樣腫脹。至於現年22歲嘅吳雨霏（Kary），忙完宣傳後就懶得化妝打扮，即刻走晒樣，嚇死人！

自爆頻約異性

廖碧兒前晚同名模AnaR.喺灣仔出席珠寶活動，佩戴用朱古力製成嘅飾物。骨架唔細嘅廖碧兒唔止身形圓潤咗，佢仲要揀好蝦人着嘅低胸閃片吊帶裙，令佢嘅水桶腰更突出，拍喺瘦蜢蜢嘅AnaR.隔籬，零舍好肉地，尤其佢一對粗壯手臂，特別礙眼。馮仁昭覺得身為瘦身廣告代言人嘅佢真係要努力keep吓。
廖碧兒話：「AnaR.本身係model，我係藝人嘛，我哋身材同型格都好唔同，自己陽光啲，AnaR.就cool啲。」曬得一身古銅色嘅碧兒拍埋白皙嘅AnaR.度，一黑一白，一肥一瘦，相映成趣。問到碧兒同陳豪𠵱家係乜嘢關係？佢迴避並轉話題，自爆近日同異性朋友去街。
Kary前晚就去咗灣仔捧黃偉文（Wyman）嘅舞台劇場，素顏嘅佢一臉憔悴，問佢點解單拖睇騷，佢話啲姊妹唔得閒喎。