當年今日
關於我們
夢見CutieBB
可盈忽然想生仔
蘋果日報 2007/02/25 00:00
郭可盈稱近日發夢生了一個可愛BB,令她生仔的興趣轉濃,老公林文龍(中)當然開心。
一眾《十兄弟》演員昨日到奧海城出席活動,並與現場觀眾拜年,一片喜氣洋洋。
林文龍及郭可盈(前排左一、二)向眾演員派發利是,皆大歡喜。
李逸朗表示十分不慣《十兄弟》裏的醜怪造型,還慘被姪兒改名為「妖怪叔」。
郭可盈、林文龍以及一眾《十兄弟》演員昨日到奧海城出席「金豬人日賀新禧」活動,郭可盈表示近日不停被人追問何時生BB,日前她發夢生了一個十分可愛的BB,她說:「唔知係咪呢排俾人問得多,搞到發夢見到自己生咗個BB,個樣真係好得意好靚,搞到我對生仔嘅興趣濃厚咗。」此時林文龍即時在旁笑說:「邊有人會當生仔係興趣㗎?其實已經好多朋友幫口勸佢,又講咗好多生仔心得畀佢知。」
此外,對於十兄弟的造型被批評古怪,有份演出的李逸朗(Don)都深表讚同,他更形容拍攝時各人有如參加鬥醜比賽一樣,他說:「初時拍呢套劇我哋個個都好唔慣,仲覺得自己好肉酸,之後惟有日日照鏡、潛移默化當冇嘢,但係咁多個之中,我就選黎諾懿個造型最肉酸。」阿Don又透露其姪兒看完劇集後幫他起了別名,他說:「我個姪本來叫我做阿叔嘅,點知佢睇完套劇就改口叫我做妖怪叔,我聽到之後好傷感呀!」
採訪:李珮洳 攝影:仇志德