謝天華、鄧萃雯同商天娥合演嘅無綫劇集《師奶兵團》，今年播出時大受師奶觀眾熱捧，呢套劇嘅平均收視有成33點，約214萬觀眾收看，暫時成為全年平均收視之冠，呢套劇嘅監製林志華立即籌劃下月開拍同樣以師奶做題材嘅新劇《師奶股神》，今次選用天華搭娥姐做兩公婆，仲會加埋林嘉華、蔡子健同滕麗名，下周四佢哋仲安排試造型。
馮仁昭八到天華會扮演證券行經紀，而娥姐就係佢老婆，全職師奶，更背夫炒燶股票。因為近期股巿暢旺，全民皆股，銀行嘅股票機前聚集晒一班師奶同阿叔，仲有報道話大學生都逃學炒股，所以監製林志華馬上食住呢個坊間熱門話題去發揮，劇情同樣以輕鬆寫實手法為主。

畀貼士怕累街坊

娥姐喺《師奶兵團》劇嘅演出爆笑，呢次佢扮演背夫炒燶股票嘅師奶，問佢平時有冇炒吓股票？娥姐話：「我有買吓藍籌，試過有賺同有蝕。」問到娥姐有冇貼士？佢話：「心水貼士就唔好講，講得好，人哋就話多謝，萬一唔好，真係鬧到祖宗十八代，咪搞嘞。」娥姐仲話上次喺《師奶兵團》劇同天華冇乜對手戲，佢好期待今次扮兩公婆，佢又話：「套劇仲有林嘉華、劉玉翠同陳國邦，大家都係好戲之人，又係街坊，肯定拍攝時會好熱鬧好開心。」