噚日中秋節，相信大家都過咗一個團團圓圓嘅節日，香港「四眼Cue后」吳安儀就過咗一個不一樣嘅中秋節，就係應邀到港台普通話台《寰聽世界》嘅錄音訪問，全程講足一粒鐘普通話，佢就話真係好少有！錄完音之後，安儀仲要去練波，皆因下星期又要出trip比賽，Cue后真係唔易做㗎。

安儀話，記得以前曾經喺中國比賽後接受訪問嗰時，被人笑過佢嘅普通話差，但噚日訪問後，連嚟自北京嘅主持人孟繁旭都大讚安儀普通話唔錯，睇嚟佢都下過苦功喎。
講番中秋節，平時最鍾意同爸爸喺中秋節食水果嘅安儀，話由於正日嘅收費太貴，所以會喺呢個周末先同屋企人補食中秋飯；而下周六（24號），安儀就要起程去到杜拜，參加一項全新嘅亞洲賽，佢話以「享受比賽」為主，未來嘅目標係想有多啲同男球手切磋嘅機會。
另外，「長跑夫妻」陳家豪同姚潔貞，今晚就會返姚潔貞娘家過中秋，家豪祝大家人月兩團圓。潔貞之前要備戰里奧，兩小口上年喺中秋分隔兩地，今年終於一齊過喇。