袁偉豪喺非洲用信息問張寶兒如果要你做我背後的女人後，返到香港就想縮沙，話想同寶兒做番朋友、同事，但係佢嘅決定，唔夠廿四小時，就俾內心嘅袁偉豪擊退，終於同寶兒走在一起！( 新聞連結： http://bit.ly/2erMu68 )

對於男友嘅反反覆覆，張寶兒接受周刊訪問時，被問到可介意男友出爾反爾，佢就話自己冇介意，仲話自己個性灑脫，覺得緣份有就有，冇咪當一個回憶！

講到袁偉豪用信息試探佢嘅時候，寶兒話當時第一個反應係怕自己會錯意，唔知道佢嘅意思同自己諗嘅係咪相同，所以佢決定用一個敷衍嘅答案去回覆對方，亦因為嗰次信息互通，佢哋就開始去傾關係上嘅問題，寶兒話回想起都覺得幾浪漫添！

今年只得25歲嘅寶兒，仲大讚36歲嘅男友依然有年輕嘅一面，係一個好有童心嘅男人。報道入面，寶兒話男友能夠喺娛樂圈堅持咁多年，某程度都有夢想。而佢嘅思想又比較成熟，大家都可以溝通。寶兒話，雖然佢哋嘅社交圈子唔同，佢係剛畢業嘅小妮子，幸好佢哋嘅價值觀都好相似，發覺呢個男人同佢嘅距離其實好近。

當36歲嘅袁偉豪遇上25歲嘅張寶兒，袁偉豪喺專訪入面都話自覺同女友有代溝，但就慶幸女友冇將佢當成Uncle，冇嫌佢老，而佢亦冇嫌女友o靚妹。先後同兩個港姐拍拖，袁偉豪即被封為「港姐殺手」，佢就好謙話多謝大家睇得起佢喎，覺得只係咁橋佢哋都係港姐，話自己呢個年紀只想穩定。