英國禮拜二最轟動嘅新聞，當然係曼聯炒摩佬喇，不過佢地嘅同市宿敵曼城，同日亦出戰咗英聯盃八強鬥李斯特城，喺奇雲迪布尼、阿古路正選下，法定時間兩隊踢成1:1平手，結果藍月憑互射12碼贏3:1，總比數4:2晉級四強。賽果唔算令人意外，但12碼嘅過程中，一向射術不精嘅史達寧竟然主動獻醜，打算學派路瀟灑笠射12碼點知炒高，隨即畀利物浦前隊友、李城門將丹尼禾特當面恥笑，一眾利迷當堂非常高興，直頭要高路普簽番禾特番紅軍添！

頭輪李城嘅哈利馬古尼同曼城嘅根度簡都射入，第二輪李城死球專家富治斯主射「飛機」，曼城就派出一向自信爆棚嘅史達寧主射，點知呢位前利物浦球員，竟然玩高章選擇笠射，結果將個波踢到鬼死咁高，曾經同史達寧喺紅軍做過三年隊友嘅李城門將禾特，隨即面向「丁力」瘋狂恥笑，而呢一幕亦被不少利迷「Cap圖」，有人話呢一笑可以成為年度最佳圖片，有人就話禾特「一日紅軍一生紅軍」，成功向「25仔」史達寧出氣，甚至呼籲高路普簽番禾特添！

雖然利迷沉醉於史達寧MISS一幕，但可惜李城始終都係唔爭氣，之後兩球12碼都畀曼城20歲嘅科索沃門將艾利真歷梅歷治救出，最終曼城總比數都係贏4:2晉級。值得一提嘅喺，夏神細路杜根夏薩特喺同日德甲代表幕遜加柏時，同樣笠射12碼炒粉，所以話與其獻醜不如藏拙啦，無料就千奇唔好扮四條，射12碼都係穩穩陣陣掃入，一樣會贏得掌聲呢！

--------------------
新球季，新陣容！利物浦 FC 18-19季球星進駐《BFB》！立即帶領紅軍，踏上登頂之路！ http://bit.ly/2oQObi1

--------------------
《體蘋果》陪你睇波講波
https://www.fb.com/appledailysports