麥浚龍（Juno）執導電影《風林火山》拍足8個月，五大演員古天樂、金城武、劉青雲、梁家輝同高圓圓嘅戲份，終於全部煞科，o依家進入後期製作階段，幕後特輯短片同相片亦曝光，全部都係黑白好有風格。

喺片中見到有爆破、屍橫遍野、雪景、火燒、封隧道拍攝嘅場面，Juno仲親自上陣度動作甫士，煞科時同金城武、古天樂等逐一擁抱，Juno喺特輯裏面話：「喺極嚴寒氣溫，橫跨咗50幾60度，由最炎熱拍到最凍，係一個好難忘時刻。」呢部戲先後喺大陸、香港同外國取景，劇組經歷由30幾度高溫到零下20幾度低溫嘅考驗，從城市拍到雪山，由夏天拍到冬天。

4年前成功執導處男作電影《殭屍》嘅Juno，今次請番為《殭屍》配樂嘅英國作曲家Nate Connelly助陣，幫《風林火山》創作多首電影音樂，連幕後特輯都捨得花錢配埋音樂。日前Juno出席香港國際影視展表示：「我對自己要求特別嚴格，因為最大嘅敵人就係自己，為咗要拍一場真正嘅雪景，足足等咗幾粒鐘。」

精選娛聞，喺晒《娛果》
http://fb.com/appledailyent