【500日遊24國】 豁出去漫遊半個地球 單車夢想男︰人生路自己揀
埃及土耳其單車南非以色列約旦肯雅五月天烏干達巴勒斯坦哈薩克贊比亞蘇丹塞浦路斯坦桑尼亞盧旺達阿塞拜疆烏茲別克阿美尼亞格魯吉亞吉爾吉斯埃塞俄比亞陳振興納米比亞Chage & Aska阿翔赤道好望角北回歸線《頑固》MV山地興ON YOUR MARK513日24個國家25000公里
佢叫阿翔,有樣嘢佢同好多人一樣,就係佢識得發白日夢。但係有樣嘢佢比其他人叻,就係佢會去實踐夢想。
地球周長約40000多公里,漫遊25000公里,已相當於大半個地球。呢個夢,你敢唔敢發?
實踐夢想,說得何其澎湃,如何去?怎樣去?對好多人嚟講,請假已經係難事,更何況要面對家庭或財政壓力?呢一點,阿翔坦承佢比其他人幸運,「我好感恩我喺一個負擔較少嘅環境下長大」,再加上佢從事freelance工作,連請假都唔使煩。
2016年5月,阿翔開始咗佢由大埔出發、踩單車去南非好望角之旅。經過中國嘅湖南、湖北、甘肅、新疆,直奔中亞嘅哈薩克、吉爾吉斯、烏茲別克、進入高加索同東歐段嘅阿塞拜疆、格魯吉亞、阿美尼亞、土耳其、塞浦路斯、以色列、巴勒斯坦、約旦,到最後踩入非洲,由埃及南下蘇丹、埃塞俄比亞、肯雅、烏干達、盧旺達、坦桑尼亞、贊比亞、納米比亞,進而到達終點南非好望角。
豁出去漫遊,阿翔有通知親友,仲開咗個facebook專頁記錄呢趟旅程,吸引好多fans為佢沿途打氣。出走成513日,阿翔嘅眼界見聞,自然亦比人廣博︰「最鍾意係中亞,好似吉爾吉斯雖然好多山,啲路又好爛,但嗰度真係好靚好靚。」只識坐喺度發夢嘅人,就永遠見識唔到。
踩完呢趟南非之旅,阿翔沒有停步,11月開始再踏征途,到台灣單車環島。相對25000公里長征,台灣環島對阿翔來說倒是小菜一碟,不過當中的人文風景、道地體驗,卻永誌難忘。
「幾年前香港有個廣告成日播,話「投資財富等於投資幸福」。我當時已經覺得呢句話好哽耳,係咪真係有錢先有幸福呢?」對於價值觀呢樣嘢,阿翔顯得與別人不同,亦帶出咗一種反思,係咪人人都要買樓、結婚、生仔、搵學校,重複又重複咁loop住我哋嘅人生?
「揀咗嗰條路,無論幾辛苦都好,你去行完佢,呢個係屬於我嘅幸福。」瀟灑,貴在心態。
阿翔嘅故事,未必人人都能夠學佢一樣,放低一切去實踐、去仿效,但至少,要明白一樣嘢,夢,係人都識發,但發咗唔做,冇用。實踐者比起夢想家來得更珍貴。
猶記得,小編去年拍攝山地興陳振興,借用五月天《頑固》一曲,包裝成陳振興頑固嘅山地車故事。當中最後一句陳振興說的旁白︰「頑固,其實就係對得住自己。」係小編睇完五月天的《頑固》MV,感動流涕無數次後得出的頑固「定義」。一年之後,我哋發覺,係香港呢個地方,一直堅守着「對得住自己」嘅人,其實何其多。買樓買車結婚生仔,也許係好多人嘅「現實夢想」,但撇除呢啲物質嚮往以外,你,問問自己,仲有其他夢想嗎?有夢之後,你又有去實踐嗎?
採︰Cathy Chek
攝影︰峰、Neo
文、採、編、剪︰Roy Leung
----------
球迷一定要知!英超一哥曼城,已經登陸『BFB』!登入即送藍月球星: http://bit.ly/2AAiPDS
2014年嘅某天,阿翔對住屋企張世界地圖忽發奇想,就此開展咗513日之旅。
旅途上未必有熟識單車機械嘅人幫手,因此砌車整車等基本功都係阿翔自己包辦。
住賓館的日子也不見得好過,阿翔話︰「好骯髒,有啲馬桶只得一個窿。」
路上肚餓並沒有米芝蓮,食嚟食去都係即食麵加蕃茄。好彩嘅話,或許能買到幾嚿肉。
仲講緊人生要搵到個肯捱麥記嘅女友?其實對好多落後地方嚟講,麥記,已經係美食。至少比呢兜冇味嘅麵嚟講係。
阿翔亦難忘喺烏干達Watoto孤兒村,同一班小朋友踩單車。
終於到達終點南非好望角嘅一刻,實現夢想嘅感覺係點?
見到呢條長長嘅路線圖,真係隔住個mon都嚇到腳軟。
返港後阿翔並無停低,馬上出發台灣環島,並於上周完成返港。
半年內,阿翔踩過烏干達嘅赤道,踩過納米比亞嘅南回歸線,今次仲踩過台灣嘅北回歸線。邊個夠你威?