近日馬圈兼全城熱話，必然係何君堯愛駒「天祿」原定出戰剛周三（18日）晚谷草賽事，馬會罕有將佢跑嗰場二班賽編做第一場，諗住早跑早着，等啲「打氣」人士跑完可以早啲散水。

點知馬會最終疑似驚得滯，怕太多示威者圍堵馬場，卒之嚇到取消整晚賽事，事件震驚全港！

呢單嘢可以話破天荒兼史無前例，何君堯搞到上埋A1頭版，之後何君堯出咗聲明，話喺社會動亂平息之前，「天祿」唔會再次上陣，聲明的語調溫和，似乎何君堯受到某啲人畀壓力。

有馬迷認為匹馬無辜，加上又有質素，但因為有位惹火馬主影響競賽生涯，其實相當冤枉；又有人認為要強制將佢退役，到底未來何去何從？

如果未來「天祿」回復報名，馬會應該點樣處理？斷估冇理由次次報名都要取消賽事，馬會有何應對良策？馬會又應否回應馬迷聯署，褫奪何君堯的馬會會員資格？

另外，開咗呢條「人為」取消賽事嘅先例，會唔會帶來乜嘢後遺症？馬會能否喺密麻麻嘅日子辦補賽？又有冇比較折衷嘅方法處理？

此外，唔少騎練對於今次取消賽事相當失望，因為好可能今次佢哋谷到啲馬行晒，就係為咗當晚搏殺，取消賽事打亂佢哋部署又是否公平？

咁大件事《蘋果》賽馬動新聞豈能坐視不理？一於整番集Video Talk分析一下，今次嘉賓卡士點能夠馬虎？

除咗有主持GM張凌良外，仲請到「百步穿雲」、「競技勇士」、「東山再起」的團體馬主才女梁芷珊，亦有「甲烷」馬主孫柏文做嘉賓。

此外，還包括才子級馬評家余伯樂、賽馬節目主持兼評馬人梁浩賢，呢個鑽石級陣容，你又點能夠唔睇呀？

想重溫足本內容，可到果燃台： https://bit.ly/2lXNJ3Z

-------------------------------
參加《玄機解馬》節目，可免費畀美女堪輿學家唐碧霞睇八字、睇相指點迷津，快啲入嚟報名。
https://forms.gle/dN9hfSiFxc7T8E436
-------------------------------
馬匹賽績、騎練數據、名家貼士
【最強贏錢武器 盡在蘋果馬網】
https://hk.adai.ly/e/5nFdCiYq8Y
-----------------------------
【撐學生】
召集有心人 撐學生全年睇《蘋果》
立即按此
-----------------------------
《囚牢之疆》 專頁
揭開集中營邪惡面紗
今日新疆 明日香港