港股上星期由低位勁升超過2000點，稍為調整實屬正常，假如大市整固而唔上唔落，理論上最有利細價股炒作，而剛巧現在正值股仔業績期，相關股份或有機會借勢炒上。事實上，大市自去年高位大跌近30%，其間股仔跌幅，不少達到70%以上。
近兩日公佈業績之股份當中，虧損者多，賺錢股只佔少數，其中一隻為中國林大（910）。集團截至今年3月底止年度，持續經營業務收益10.23億元，增長近40%，年度溢利則達到27.43億元，大幅增長近1倍，每股基本盈利有51.03仙，每股攤薄盈利43.86仙。以一隻股價僅69仙的股票而言，牌面數字是非常誇張。

林大炒上應仲有水位

林大之所以有此強勁業績，其中一個元素是生物資產公平值變動產生之收益，期內達到20.9億元，這是新會計準則所賜，至於如何計算以及為何有此準則，要問問專業人士，但既然此會計準則全球大部份地方通用，亦毋須深究。整體而言，林大盤數也有其他可取之處，包括成本不見大增，融資成本更大減近半。
林大股價自去年中高位3.20元急跌，最低跌落0.59元，上周五報0.69元，較高位仍勁跌78%，借呢份業績，應該仲有反彈水位。
今日續有多隻股份公佈業績，兗州煤業（1171）已率先發出盈喜，其他資源股如紫金（2899）、中煤能源（1898）今日業績，隨時又會有驚喜，或會帶起其他資源股都未定。
股仔方面，已轉型進軍投資印尼鎳礦的百營環球（761）今日公佈業績，如見股價及成交有異動，或有短炒機會。