日本組合Morning娘前成員吉澤瞳於昨早7時，涉嫌醉駕傷人不顧而去，被警方拘捕。當時佢酒醉駕車至中野區，衝燈撞到一名揸單車嘅20來歲女子，該女子跌低時再撞到一名40來歲男子，兩人均受輕傷。

吉澤瞳被警方審問後，昨晚由中野警署移送至原宿警署，當時佢一臉憔悴，全程始終低著頭不發一語，被警察帶上車。據一名目擊事發嘅女學生表示吉澤瞳當時冇煞車，單車被撞到飛離幾米，吉澤瞳太驚立即走咗。據警方表示案發後約15分鐘，吉澤瞳返回現場報警，接受酒精測試，被驗出體內酒精含量超出四倍，當時佢解釋話周圍太多車，所以停唔切車，所以遲咗報案。不過有喺附近工作嘅人指，事發於大清早冇可能有好多車。

吉澤瞳胞弟於2007年因交通意外離世，佢亦曾經擔任交通安全大使，其醉駕傷息人消息傳出後，即受盡批評，而吉澤瞳原獲委任為三芳町宣傳大使，有關方面今日決定將佢辭去。而有日本傳媒報道，吉澤瞳醉駕傷人，更不顧而去，如罪成最高面臨判刑10年，以及罰款100萬日圓（7.1萬港元）

精選娛聞，喺晒《娛果》
http://fb.com/appledailyent