𠵱家做香港人都好慘,之前有毒奶事件,𠵱家又有金融海嘯,出街食嘢又貴又驚中毒,搞到成個社會氣氛人心惶惶。小妹早幾日同同事小貴子傾開,佢啱啱結婚,朝早有老婆親手炮製愛心早餐。佢仲話最近買咗部豆漿機自製豆漿飲,又浪漫又健康,唔使飲埋啲三聚氰胺黑心奶。
佢話做法好簡單,只要夜晚臨瞓浸咗杯黃豆,第二朝起身將黃豆再蒸約30分鐘,然後將啲黃豆加入三杯水再注入部機嘅容杯入邊,再加糖或者係薑,怕肥就唔好加糖嘞。㩒個掣大約等5分鐘,咁就有新鮮美味嘅豆漿飲嘞。
小貴子仲話,佢打算買麵包機、乳酪機咁,係屋企同太太煮飯仔,自製麵包、蛋糕㖭,增加生活情趣咁話。