民主派立法會議員區諾軒日文了得唔少人都知，但原來佢另一種語言亦相當流利，今日仲喺立法會提出休會辯論時「表演」。話說區諾軒今日喺立法會開會期間，就沙中線工程質素及安全風險提出休會辯論時，全程用字正腔圓嘅普通話讀出動議，唔少人為之驚訝。

區諾軒事後解釋，用普通話提出動議，係因為想廣大中國人民都聽一聽港鐵問題，因為未來沙中線相信都有內地同胞乘搭，佢仲搞笑話，好多建制派都話立法會主席梁君彥聽唔明普通話，所以佢想測試吓梁君彥普通話水平，而梁君彥最終都聽得明佢講乜喎。

問及普通話咁流利，區諾軒自爆10幾年前仲考過普通話水平測試，並獲取「二級甲」成績，但就好謙咁話，自己啲語言其實麻麻喎。