地鐵（066）進軍歐洲，旗下合營公司奪得倫敦新鐵路嘅專營權，喺《香港討論區》就有唔少網友話，呢個消息會對地鐵股價有幫助，睇好後市，網友殺出血路話，「喺香港發展始終有局限，今次嘅收購會幫助地鐵走向國際化、世界級！」Markerz亦認為呢個係好消息，「相信66短期有機會被炒上！」
Iyhas就話：「小弟月供地鐵都有成半年，股價都冇乜點好到，由22蚊跌到落18個幾，希望今次嘅利好消息能夠將股價推番到合理水平！」MT插口話：「其實只要地鐵繼續本末倒置，搞物業做主菜，個股價就實掂！」
不過，MKW264唔睇好：「呢個係好消息，但對股價唔會有太大幫助，話晒昂坪360之前跌過落嚟。」

哈哈二世更講：「地鐵無論點都係悶股一隻，有盈利就俾人插佢票價高，攞到專營權又點，盞俾班立法會議員插佢唔專心搞好香港鐵路；家吓佢嘅管理都仲未算係世界級，我朝朝喺太子轉車，佢就梗校啱時間要我睇住班車走，對面車閂門，我嗰邊先開，外國邊會咁㗎！世界級嘅管理就係你企喺月台睇佢兩分鐘嘅廣告！」
SIRPOON話：「講乜都假，你話佢服務質素點樣唔好，咁又點，最緊要年年賺大錢，為股東創造財富。」大隻金亦好同意：「佢賺唔到錢，就算曉飛都冇用！」
http://www11.discuss.com.hk/viewthread.php?tid=4518920&extra=page%3D9&page=2