三靚女觀戰心口餵蚊
馮仁昭四圍超:古仔、青雲搞笑燒雞翼格鬥

蘋果日報 2002/08/06 00:00


張栢芝、古天樂(古仔)、劉青雲、關之琳(之之)同梁詠琪(GiGi)主演嘅電影《絕世好B》,呢個禮拜五就會上映,呢部戲以搞笑為主。
有場戲係講佢哋五個主角走去西貢燒嘢食,點知燒燒吓,古仔同青雲忽然打起上嚟,佢兩個打打吓竟然以為自己係法國拿破崙時代嘅劍客,為咗喺幾位公主(栢芝、之之同GiGi)面前扮英雄,想贏得佢哋嘅芳心,於是佢哋攞住燒烤叉,連埋隻重燒緊嘅雞翼,拮嚟拮去,非常搞笑。

熱到濕晒
古仔同青雲拍呢場戲時,身上嘅戲服將佢哋包到實晒,加上天氣好熱,搞到佢兩個全身濕晒,每拍完一個鏡頭就返上車廂歎冷氣。而幾位女主角一樣好辛苦,因為佢哋着住件低胸宮廷裝,畀啲蚊係咁嬲佢哋個心口,搞到個個心口紅晒。栢芝件戲服比較密實,所以就冇俾蚊針得咁厲害。

江芷妮讚張燊悅友善
江芷妮日前接受訪問,對於早排張燊悅不滿星皓偏心其他藝人一事,佢話:「做藝人一定有好多壓力,但係呢啲係代價。可能佢(張燊悅)都好大工作壓力,不過我同佢唔熟,喺公司見到會點吓頭,我覺得佢幾友善。」問江芷妮覺唔覺得公司偏心時,佢話:「我唔覺得公司偏心,公司對個個都好好,都係按個人嘅需求而安排工作,一視同仁。」
城城無緣做消防員
郭富城(城城)日前為無綫重頭劇集《烈火雄心II》主題曲《燈蛾》拍攝MV。原本城城諗住扮消防員過吓癮,同時想聯同劇中嘅演員一齊拍攝,不過因為大家檔期唔夾,所以最後城城改為去一間消防員成日去嘅酒吧拍攝。雖然城城冇機會扮消防員,但佢話有時間都會追睇《烈》劇。

王傑指康仔戒毒助唱歌
王傑噚日以前輩身份去尖沙嘴出席《2002全球華人新秀歌唱大賽》宣傳。王傑對於蘇永康被判入戒毒所一事,佢話康仔已經做得好好,敢面對現實,王傑話:「以音樂角度嚟睇對佢有幫助,可能到時唱歌感情會濃郁啲。」

惠英紅寧領養BB
惠英紅噚日去新城電台做訪問。對於陳寶蓮自殺身亡,惠英紅話:「我未見過佢,不過生BB要負好重責任,所以我唔會生。如果想要細路可以去領養一個,所以將來如果要結婚,都要同男友傾掂數先。」佢話哥哥惠天賜雖然同斑斑分開咗,但依然重係好朋友。

肥姐叫霆鋒稍休
沈殿霞(肥姐)噚日去尖沙嘴出席《兒歌金曲頒獎典禮2002》活動。肥姐啱啱喺新加坡返港,對於霆鋒有意暫時退出娛樂圈一事,肥姐話:「好多auntie都好關心佢,又唔好唔做,可以暫時休息吓先,但希望傳媒畀啲空間佢,可能佢唞唔到氣先會咁。」