最近有單新聞，有「苦主」買了個256萬元，只得292呎的工廈劏房單位，筆者認為該位苦主，其實係一名冇做功課的投資者，過程可能有人隱瞞違規或涉及誤導等等，但投資涉及風險，點解買保險嘅時候，政府有一套系統監管，但工廈劏房呢類納米樓，卻無監管呢？

香港有鼓「樓奴瘾」，尤其過去幾年樓價升幅驚人，冇買騰訊（700）（最近多咗隻美股叫Amazon），又冇買樓嘅港人，彷似「人生輸家」，市區新樓呎價動輒近兩萬，郊區都要1.5萬，入場門檻低嘅劏房、劏工房，就係買唔起樓嘅另類選擇，但呢種選擇同倒錢落海冇分別。幾年前，商場劏舖拆售，已令一眾投資者損手爛腳，新聞見得多，但肯睇嘅人又有幾多？調返轉講，過去幾年嘅劏房咁好賣，正因為市場上有需求，但呢批需求者，好多都唔經大腦去買，就正如台灣嘅林鳳營奶製品，口話抵制，減價咪一樣去搶！

可能磚頭嘅吸引力實在太過驚人，過去幾年只要上到車，99%都贏到錢，260萬唔夠買到個單位喎，等2-3年升30%都賺到差不多一球喎！過去幾年香港樓市的往績實在太靚仔，無論係數據派或者係圖表派，樓點都實賺，呢個心態遇上而家嘅市況，就係中伏嘅開始。無論加息、新興貨幣市場危機定貿易戰，要炒樓絕對係最差嘅時機。

後記：新居屋有十幾萬份申請表，抽中等如中六合彩，但抽到都要有十幾廿萬首期，筆者聽得太多，好多後生仔，無論係剛畢業嘅新鮮人，定係做咗幾年嘢嘅「月光族」都去抽，抽中點？問人借囉！　所以買劏房中伏嘅人，同呢班月光族一樣…..至於係咩形容詞，留返各位自行填充。

斯郎

https://fb.com/oneroadonebelt/

全球樓行 Dream House零距離
https://hk.feature.appledaily.com/overseasproperty