隔牆有耳:成立正義聯盟黨
偲嫣BB參選殺出血路 - 李八方

蘋果日報 2015/06/25 00:00


「請投畀正義聯盟候選人、支持正義聯盟候選人」,唔通神奇女俠、綠燈俠等外國勢力,都嚟參加區選同立法會選舉?呢個其實係港產正義聯盟,咪就係李偲嫣所搞嘅撐警反佔中組織,佢哋噚日喺一間油麻地caf𥌎開記者會,宣佈8月成立「正義聯盟黨」,話要喺「藍黃」陣營中殺出第三條路,偲嫣BB表明積極考慮親自或派黨員參加嚟緊兩個選舉。
唔做傳統建制派
偲嫣BB話,正義聯盟黨會貫徹支持警察嚴正執法,將來會專注服務中產及基層市民。唓,咁咪係另一個建制派?
No no no,佢話好唔滿意𠵱家政治局面唔係藍就黃,所以要殺出第三條政治出路,所以個黨路線同建制不同,叫傳媒唔好將佢哋歸類為建制派,聲言唔會走傳統建制政黨路線,唔會做任何特首嘅啦啦隊,唔會「盲撐」政府,政策有問題就會反對。乜講到𠵱家嘅建制派,咁鬼不堪?
其實八方好想知道,佢哋若然參選,會唔會以成功絕食減肥、美圖呃like做賣點?又或者「踩場無罪、撐警有理」,又會唔會係佢哋嘅競選口號?
可惜偲嫣BB噚日搞呢個宣佈個人新動向嘅記者會,唔畀《蘋果》同壹傳媒人員在場採訪,仲要喺caf𥌎門口貼出告示,表明會查記者證,一經發現壹傳媒記者在場,會被要求離開,拒絕離開就報警。

李八方
mailto:[email protected]
empty
噚日偲嫣BB喺門口貼告示,請八方食檸檬。