韓國7人男團GOT7日前來港拍攝新歌MV，準備於下月中出新碟回歸，不過今日突然傳來消息，指香港成員Jackson（王嘉爾）將不再參與GOT7於日本嘅活動。

負責GOT7於日本活動嘅Sony Music，今日於官網表示：「考慮到GOT7成員Jackson於調整日程及管理身體健康狀態方面嘅需要，因此將不再參加日本嘅相關行程，除特殊情況外，GOT7今後於日本嘅專輯及演唱會活動將以6人體制進行。」

其實Jackson早前於大陸solo出道時，已有傳佢會退出GOT7，不過當時Jackson嬲爆回應，表示佢唔會離開佢愛嘅GOT7，但今次突然停止參與GOT7於日本嘅活動，難免再次引來粉絲各種猜測，有粉絲指GOT7所屬嘅JYP事務所想雪藏Jackson，亦有人指Jackson要忙於專攻大陸市場，亦有粉絲留言表示擔心Jackson健康，希望佢可以好好休息。

而GOT7噚日已離開香港，並安全飛抵泰國。