香港人使用銀行服務非常方便，除了網上銀行服務普及易用外，仲梗有一間分行或櫃員機喺附近，所以當揀銀行服務時，可能會着眼於利率或有關收費。但外國人嘅考慮因素就可能好唔同嘞！
喺《華爾街日報》網上討論區進行的調查顯示，投票嘅1500人當中，超過六成認為分行嘅營業時間、係咪就腳、有冇提供網上銀行服務，都係決定用邊間銀行嘅主要因素，只有12%及26%嘅網民分考慮利率及收費問題。
網友StMcKi留言話，過去10年都係用同一間銀行，但佢喺呢段期間從來都冇再踏足過銀行半步，因為銀行有完善嘅網上服務，平日提存現金，只需透過自動櫃員機就得；有問題嘅話，打熱線電話查詢，就會即刻有人接聽，唔使嘥時間聽電話錄音。
對於不少網友嚟講，幫襯就近嘅銀行固然係好，但家陣銀行職員不斷推銷產品，亦令好多客仔好鬼激氣。

推銷產品最反感

RandyShingai話，佢偶爾會落分行排隊買存款證，但次次都畀啲職員死纏爛打，向佢sell互惠基金、年金之類，令佢不勝其煩。佢話有時見到啲職員甚至向已經80幾歲嘅長者埋手，推銷啲至少要7至8年先到期嘅投資產品，佢就覺得過份囉！
RBStanfield亦留言話，唔單止銀行職員疲勞轟炸、成日促銷保險及基金產品令人反感，其實銀行經常巧立名目濫收費用亦同樣惡頂。
雖然如此，仍然有唔少人鍾意使用櫃位服務。MadCityBuddha就話，佢唔鍾意網上銀行服務，因為佢最享受去銀行打簿時，翻開佢本彷彿會散發金光嘅存摺，佢話睇住自己一點一滴累積番嚟嘅財富，就好心滿意足嘞！