年僅9歲嘅Celine因為《全美一叮》爆紅，原本係一件好事，不過其父譚順生嘅為人似乎為人詬病。除咗家燕姐之外，連日嚟都有唔少前員工爆料或被網民揭發譚順生問題多多，其中仲有指譚順生喺fb自我介紹，聲稱08年喺菲律賓馬尼拉University of Science and Technology畢業似乎同音樂無關，而佢嘅個人網頁仲將Dr. Steve變成Steve Tam，原因就得佢自知。

是非不斷嘅譚順生日前同囡囡搭飛機返港，今日喺銅鑼灣舉行新碟發佈會宣傳佢嘅個人唱片，現場約30名傳媒採訪，喺記招中backdrop仲用番「Dr.Steve」名銜o添！而喺記招中，譚順生將會回應近日嘅種種傳聞，不過就不設記者問答環節。

Celine爸爸譚順生今日着住一身深藍色西裝現身唱片發佈會，對於近日連串負面新聞，譚順生甫出場時，並冇交代，亦唔見滿面愁容。佢喺台上同司儀chit-chat時話：「好感謝公司幫我出呢張唱片，因為自己好懷念過去，本身係好地道香港人，睇住香港劇集長大，其實樂壇咁大，應該可以容納到我唱呢啲劇集嘅主題歌，亦都多謝公司同電視台幫我傾歌曲版權，今次我揀咗9首歌，之前喺9個景點拍攝，試過喺獅子山下拍，有好多晨運客睇住我唱歌，好似我啲fans咁，之後都有同佢哋影相。」

切完公司為佢準備嘅生日蛋糕後，譚順生就一臉嚴肅，開始回應連串是非，而早前俾網民發現佢個音樂學校官網中，冇再用Dr.Steve呢個名而改用Steve Tam，(新聞連結： http://bit.ly/2tIkOjH )對於學歷問題，譚順生就話：「我嘅學歷証明，其實的而且確我2008年係博士畢業，我喺呢間菲律賓馬尼拉University of Science and Technology畢業，就有呢張証書，好開心，點解我要有博士學位証書呢？主要原因係喺2013年開歌唱學校之前，我開咗我嘅獵頭公司，咁獵頭公司係一個好專門嘅行業，我發覺到自己需要一個專業資格，咁喺2006年適逢我認識到呢個課程，經過2年辛苦嘅學習、寫咗嘅論文，跟住2008年我就畢業。」佢仲話「Dr.Steve」就係咁沿用到o依家：「咁喺我朋友同我生活圈子中我一路都用『Dr.Steve』呢個名，用到o依家。咁呢個大學博士學位係完全、完全係事實嚟！」