ViuTV劇集《已讀不回》今日喺銅鑼灣舉行記者會，黃又南、岑樂怡、羅家英同廖啟智等人劇中演員都有出席，家英哥喺呢套劇飾演牧師，佢話：「冇乜對白，得60字可以講晒，主景喺冷氣室裡面，好舒服！」智叔就話同家英哥有好多對戲：「佢真好好戲，唔使靠對白，靠眼神，身體語言同功架就得，希望之後可以繼續有合作。」

家英哥之後再話：「聽講美國四大電影公司會投資港劇俾香港人話事，之後喺美國上映，我哋呢個年紀好，公公婆婆爺爺女麻女麻都可以做，價錢、脾氣同演技樣樣都好，唔使驚！」 智叔就話總之係平靚正！後來又問到汪阿姐又有冇嚟探班，家英哥就話：「講明唔想互相去探班，費事影響，而且大家都係咁多嘴喎，聽導演講就算啦，又要聽呀姐講嘅話，導演情何以堪？」

早前楊盼盼喺大馬拍劇俾火燒傷，家英就話：「佢o依家冇事，因為割咗死皮，怕感染，o依家喺醫院休息，大家唔使擔心。」智叔就笑笑口話：「火燒旺地、好旺，我都想燒吓。」又南話睇到啲預告片覺得好開心，同大家keep住聯絡。

精選娛聞，喺晒《娛果》
http://fb.com/appledailyent