踏入首季業績放榜高峯期，唔少企業發盈警，證明經營環境依然困難，不過盈警都有真假之分，醫藥股利君國際（2005）就係假盈警嘅好例子。
截至去年底，利君全年轉蝕4140萬銀，主因大輸液業務預期毛利率下跌，需就商譽減值撥備2.24億銀，但唔影響現金流，末期息照派2仙。事實上，去年產品收益全線增長，難怪3月宣佈盈警後，股價反高潮展開升浪，反映壞消息已盡出。集團上周五公佈首季數據，營業額按年增長12%，去到6.1億銀，毛利率則輕微收窄至42%。主打嘅靜脈輸液動力澎湃，按年增長逾三成達3億銀，佔整體生意接近一半。集團最近曾3次回購共157萬股，回購價介乎1.56至1.61元，雖然金額唔算多，但象徵意義更勝金錢數字，證明現價物超所值，利君上周五收報1.69元，跌1.7%，倘突破前高位1.80元，有力衝上兩蚊，較現價有近兩成潛在升幅。
唐牛