上個禮拜至講過，內地官員做事效率快到嚇親你，但有時就慢到得人驚。好似中國建設銀行行長王雪冰炒魷事件，八方睇到都唔知好嬲定好笑。
王雪冰做中國銀行行長時涉及多宗問題貸款，已經係兩年前嘅事，直到今年一月十號，中央組織部同國務院先至拍板將佢炒魷，但係建行一直唔出聲，到記者在十一號問到建行發言人，發言人先證實王雪冰無得撈，副行長張恩照取而代之，原因唔講，但係八方見建行官方網站重係王雪冰做緊行長，重有一篇「行長致辭」。
前日八方再上建行網站，「行長致辭」裏面王雪冰張相已經換咗張恩照，王雪冰個簽名就換咗張恩照個名，奇就奇在篇「行長致辭」內容完全一樣，隻字不改。
建行直至噚日先至正式宣布張恩照做行長，但對王雪冰就提都唔提，好似呢個世界從來無呢個人咁。中國人民銀行行長戴相龍話王雪冰只係被免職。
如果王雪冰真係行動自由，唔知佢會唔會向無乜人情味嘅建行追番版權費？定係佢會在十號至十五號期間以建行行長身分，簽番幾份合同？


E-mail：[email protected]