區區一元對很多人來說可能微不足道，在網絡世界卻可能引起公憤。以牛肉飯聞名的連鎖快餐店吉野家，追隨麥當勞於上月底悄悄加價，29元以下食物一律加價一元，網友批評吉野家無理加價，又質疑提高售價後食物份量不加反減，聲言寧願自己動手炮製牛肉飯。
吉野家加價事件是近日迷你論壇最熱烈話題之一，Yoshiki137稱「我以後唔食佢啲飯嘞。」KobeIp指加價後「個外賣飯盒又好似細咗」，迷你戀世代則說，「又唔係特別好食、又少款，仲夠膽死賣到咁貴！」kai*認為以前「已經貴貴哋，仲要加價，以後食少啲。」
網友一邊鬧吉野家，但對牛肉飯味道念念不忘，廸路稱大可自己動手炮製，更說「唔難煮，只要你有佢啲醬汁，我喺日本時都成日整，不過記得用珍珠米（日本米）。」

29元以下食品加1元

吉野家發言人表示，全線24間店舖上月30日起調高部份食品售價，29元以下食品及部份套餐加價1元，如大碗野菜牛肉飯由24元加至25元，40元的8號野菜牛肉飯套餐則減價兩元至38元，早餐及下午茶餐價錢不變，發言人又說加價是因成本上升，該公司兩月前轉用新款環保外賣盒，食品份量無因此改變。