劉愷威同楊冪2011年因合作拍劇大陸劇《如意》撻着，雖然同年10月楊冪否認，但11月就被爆出兩人同居消息，而到12年1月，劉愷威同楊冪亦喺微博大方承認戀情。之後，兩人無論在公在私，都不時出雙入對，更齊齊上湖南衛視春晚，手拖手唱《錯怪》。

2013年11月13日，楊冪喺微博出post宣佈同與劉愷威結婚，除咗有戒指相外，仲寫住「事情就是這樣的，大家可以來祝福嘍」，而劉愷威則轉發寫「執子之手，與子偕老，謝謝你願意把手交給我」，到翌年1月，兩人喺印尼峇里行禮。一年後，劉愷威宣佈楊冪懷孕，而預產期則喺7月，而同年3月，楊冪宣佈因生仔而停工，而之後劉愷威以「孩子他媽」嚟形容楊冪外，更公開表示會做楊冪嘅「都敏俊」。

2014年6月，劉愷威宣佈楊冪生咗囡囡小糯米，而同年12月31日，已復工嘅楊冪同劉愷威更齊齊上湖南衛視跨年晚會合唱《想把我唱給你聽》。雖然有咗小糯米，但絲毫冇減到兩人嘅甜蜜程度，不時喺微博大晒恩愛之餘，更每年不間斷地喺對方生日當日，喺微博出post傳情。

2015年，劉愷威同楊冪傳出婚變，不過兩人否認，更表示「我們很好，謝謝關心，別鬧啦」、「那些可笑的傳言就別信了，好著呢」，而17年，兩人仲同小糯米一齊參加親子運動會，又幫小糯米搞生日party。到2018年，兩人都冇再喺對方嘅微博留言祝福對方生日，至今日宣佈離婚，難敵七年之癢！

精選娛聞，喺晒《娛果》
http://fb.com/appledailyent