國際創價學會舉辦「浙江省山水花鳥畫展」，請到查大俠做嘉賓，八方問佢有關近年網上「冒牌金庸」亂咁續寫小說事件，事關早排佢仲親手寫咗篇公告批評呢班人文筆差，連做佢徒弟都冇資格，不過大俠寬宏大量，話只要班低手道歉兼停筆，佢既往不究，否則後果自負。
查大俠早前做過一對新熊貓改名比賽評審，揀咗「樂樂」同「盈盈」，有人話可能同《笑傲江湖》任盈盈有關，亦有人就話諧音「落晒形」唔好意頭，大俠話呢兩個名都係市民提出嘅，唔應該隨便再改，而且叫第二個名都一樣招人話柄，既然決定咗，不變應萬變啦。