威尼斯影展將於香港時間明日凌晨閉幕，21部競賽片已經相繼放映完畢，今日凌晨時份做放映最後兩部片，有意大利及法國合拍片《PerAmorVostro》以及內地導演趙亮執導嘅《悲兮魔獸》。

呢齣《悲兮魔獸》係講由民工角度出發，探討中國過度開發，造成環境嚴重破壞嘅議題，片尾指出政府於蒙古地區拼命開採鐵礦，運到其他城市建造高樓大廈，但房子乏人問津，變成咗一座座鬼城，呢啲已經成為咗政府拼命追求經濟成長下「不能說的祕密」。因為揭露內地醜聞，所以已經講明落封殺令，因為咁內地媒體都冇乜報道呢齣戲於威尼斯情況。

趙亮於記者會上被問到問封殺時話：「我感到很遺憾，他們甚至還沒看片子，就封殺我了。」外國有傳媒話佢已經被中國政府列入「黑名單」，有記者追問佢本人，佢愕一愕後話：「甚麼黑名單，我不知道，起碼我可以自由進出、自由創作。」當問趙亮《巨獸》會唔會係中國上映？佢話：「這片子沒有打算在中國送審，這部影片是獨立製片，我是獨立創作者、藝術家，表達是個人行為。至於日後要不要送審？那要看他們（中國政府）的態度。」