蔡卓妍(Sa)、吳慷仁、林德信(Alex)、吳浩康(Deep)、葉童及劉永等，今日喺跑馬地英皇駿景為電影《非分熟女》出席開鏡，英皇老闆楊受成都有現身支持。電影由阿Sa同吳慷仁任男女主角，其中阿Sa喺電影中飾演一名患上性冷感嘅女仔，佢話：「我飾演一個有問題嘅女仔，因為患上性冷感要搵治療師求助，角色係一個普通人，但患上一個唔講得出口嘅病，多多少少係社會壓力造成。」

阿Sa透露電影中分別會同吳慷仁、吳浩康及林德信有對手戲，更包括有親熱鏡頭，而且仲要首次喺螢幕上跳鋼管舞，佢話：「為咗呢場戲都要特登上堂學，其實都幾難。」

講到跳鋼管舞全部都要着得好性感，咁阿Sa跳嘅時候係咪要跟番標準？佢話：「我第一堂都係着住運動嘅Bra Top同波褲，但去到見到其他女仔都著晒比堅尼，於是我都跟住除。」

至於吳慷仁體戲中就飾演一名喺香港工作嘅台灣人，當中九成嘅對白都要用廣東話演繹，佢話：「我在台灣找了一個在當地開茶餐廳的香港人老闆，他教我廣東話，然後在香港也有跟老師學。」旁邊嘅阿Sa就讚對方講得唔錯，不過拍攝過程仍然會鬧出笑話：「佢有句對白本來係叫我『唔好喊，喊咗出嚟舒服啲』但佢就講咗『唔好含，含咗出嚟舒服啲』。」於是吳慷仁最後變番用國語講，阿Sa笑言：「如果唔用國語會變咗A片。」但無論係嗌人唔好「喊」定「含」，成句句子都係前後矛盾0架喎……

至於Deep同Alex兩人分別都有同阿Sa合作嘅戲份，當中Deep更同阿Sa有親熱戲，佢話：「係第一次喺螢幕上有親熱戲，不過唔係有啲咩暴露鏡頭，純粹係意識上。」至於Alex就話：「係演一名怕醜仔，一直暗戀阿Sa，但就可以睇住阿Sa跳鋼管舞。」

今日係Deep嘅正日生日，劇組送上生日蛋糕同佢慶祝，Deep話：「今晚會同爸爸食飯慶祝，佢都頂咗我幾廿年，係時候答謝佢。」問到生日願望？佢希望可以進軍紅館：「依家公司同事喺度努力緊，希望盡快有好消息。」

精選娛聞，喺晒《娛果》
http://fb.com/appledailyent