今年8月以過億歐元由多蒙特加盟巴塞隆拿嘅奧士文尼迪比利，上星期六喺巴塞隆拿主場以2:1反勝基達菲嘅西甲聯賽踢咗廿幾分鐘就因為一次後踭傳球而受傷，結果要退下火線，由迪路菲奧入替。巴塞其後發表聲明，話奧士文尼迪比利係拉傷左腿動，需要接受更多檢查以了解佢嘅傷勢，巴塞教練華維迪賽後亦都話，迪比利可能需要缺席一段時間。

20歲嘅迪比利8月以1.05億歐元由多蒙特轉會巴塞，連同附加條款轉會費最後可能會高達1.45億歐元，佢喺之前巴塞主場大炒愛斯賓奴5:0嘅西甲後備「地標」上陣，蘇亞雷斯補時入波就係佢交出助攻，到咗上周中贏祖雲達斯嘅歐聯分組賽，迪比利首次正選為巴塞披甲，對基達菲呢場就係佢第一次喺西甲正選上陣。對於迪比利傷出，華維迪話係肌肉問題，佢話︰「我哋認為可能係撕裂，但需要做進一步檢查……希望佢唔使休戰太耐。」