台灣女星吳佩慈自2014年起，先後為百億身家富商男友紀曉波誕下兩子一女以來，已逐步淡出娛樂圈，不過吳佩慈嘅一舉一動，仍然係備受關注，好似佢今晚就喺台北，獲邀出席一個由旨在扶助弱勢新移民子女嘅賽珍珠基金會舉行嘅慈善晚宴，而吳佩慈係該會嘅慈善大使。

吳佩慈久未出席公開場合，今晚以一襲淺色紗裙晚裝現身，一出場即吸引閃光燈閃個不停，吳佩慈話：「其實答應前我有點猶豫，畢竟我退出娛樂圈很長時間，但當媽媽後就能感同身受，認為應該要積極響應對新住民下一代的關懷和幫助。」

原來吳佩慈係今年先加入呢個基金會，佢解釋自己點解會成為慈善大使：「我與媽媽關係很親暱，得知賽珍珠致力於協助混血兒童與家庭的生活改善，這也連結到了我媽媽的混血身份，更能感同身受地理解，還是有許多混血兒童，因為社會上某些偏見與歧視而需要協助。」而佢更話自從有咗自己嘅兒女後，更注重下一代嘅養育問題，佢覺得可以有機緣出席同支持呢個活動，希望可以借此幫助更多有需要嘅人。

精選娛聞，喺晒《娛果》
http://fb.com/appledailyent