藝術呢家野人人有自己品味，美斯最新嘅唇印紋身就有唔少負評，我哋又睇下球星們唔同嘅奇怪紋身吖，有sell可愛、有無厘頭，直情有啲幾恐怖。

利物浦左閘艾拔圖摩蘭奴就有隻猩猩揸槍聽音樂，沙治奧拉莫斯紋啲有紀念性數字都算特別。

外國人鍾意紋中文字，意大利前國腳迪亞文迪就紋咗個「豬」字喺手臂，唔知佢知唔知點解呢？而意甲升班馬前鋒賓尼雲圖前鋒施基列迪，就將自己twitter嘅id紋上手臂，算唔算賣廣告？另一個騎呢之最，修安聯前鋒尼爾蘭加將自己個姓紋上額頭，真係慌死人唔知佢姓乜。講開自戀，曼城翼鋒利萊辛尼將自己慶祝動作紋上背脊，都算有諗頭。

恐怖啲嘅係，札幌岡薩多前鋒保夫萊特用槍枝砌成LOVE字樣，唔知係愛槍定咩喇。前水晶宮中堅迪蘭尼將個做吞槍動作嘅大頭怪嬰紋喺手臂，同埋侯城中場賴恩美臣將呀媽個樣紋喺上臂，夜晚見到都咪話唔驚！