【新增圖片】

香港跑馬冇雷神點成事，呢位神級騎師開鑼日（3日）贏晒前五場，後五場全落第，但這晚（6日）谷草佢於改在下半場才出擊，前四場零頭馬嘅莫雷拉，跑到第五場四班1200米，終於勝出大熱門呂健威馬房「獵狐者」，此駒單Win及組合獨贏A1分別派18.5及14.5元。

「獵狐者」今場帶挈呂健威打開季內勝門，兼助雷神保持開季未斷纜，最重要意義還係令到馬主「兆霖90團體」骨幹成員湛兆霖，可以親自拉頭馬，須知養馬幾十年嘅湛兆霖，雖然一把年紀年逾九十，但仍熱愛賽馬，當初牽頭和一眾家人成立此團體，無非希望齊齊拉頭馬。

回說「獵狐者」，這晚沿途前置下，最終1.8倍小勝頸位，名義上是首次贏馬，實際卻可能係第二捷，事關本身前仗由史卓豐於同班同程入Q，同場頭馬「勁皇子」事後驗出有違禁物質，稍後由馬會進行研訊其情況。一般估計「勁皇子」最終極有可能被撤銷頭馬資格，如是者「獵狐者」便會升做冠軍，變相多了一場頭馬。

呂健威表示「獵狐者」健康比較弱，今場取勝要付出代價，賽後流鼻血，需要時間休息調養，不過值得欣慰是馬主年紀甚高，今場取勝帶來一幅頭馬相，是值得紀念的美好回憶。

「獵狐者」已非首次流鼻血，早在去年11月27日服役首戰得第五名後，此駒已試過兩個鼻孔流血。

今場又開熱頭冷腳，二至四名分別為「幻影飛鷹」、「紅星」及「你知我意」，四重彩派2,011元。