顏卓靈同余香凝兩位由電影界跳入樂壇做今年新人，而且齊齊角逐今年頒獎禮新人獎，佢哋今日到港台出席「第40屆十大中文金曲」拉票記者會。顏卓靈喺活動中重遇當年拍《狂舞派》演員兼同樣係今年新人嘅劉敬雯，兩人喺台上攬頭攬頸，仲講到大家過去五年嚟努力，講到差啲喊。顏卓靈受訪時解釋：「唔知點解會咁，抱著對方就好感觸，經過了五年時間，大家各自發展、各自成長，沒諗到又有緣份一齊角逐新人獎，好感動。」對於被視為新人大熱，男友白只到時會唔會現身撐場？佢話：「唔會啦，佢想低調。」

而余香凝就話身為唱作人，自己創作嘅歌能夠推出已覺好好好彩。咁男友陳家樂會唔會幫手拉票？佢話：「梗係會，但佢依家喺大陸拍緊劇好忙，未必出席到頒奬禮。他好支持我，之前經理人結婚，佢夾硬將我首《簡單情歌》配落人哋成長片段逼人用，真係誇張。」

同場鍾舒漫就有份角逐最佳進步獎，佢話：「其實我已經入咗行不經不覺十年，出席個好多頒獎禮，獎項無諗咁多，純粹想參與件事支持樂壇。」講到師姐容祖兒今年缺席頒獎禮，佢話：「作為觀眾會方面係你覺得可惜嘅，大家都好期待佢嘅表演。」