容祖兒、蔡卓妍(阿Sa)及鍾欣潼(阿嬌)，三位相識廿載感情要好，重自封為「龍虎豹」，終於喺今年首度合作單曲《全副武裝》，今日就喺澳門新濠影匯拍攝MV兼出席發佈會。活動上三人被問到嚟緊會唔會再有其他合作？阿Sa笑言：「一定有機會，我哋同一公司，佢哋一定唔會放過搵錢嘅機會，我哋係一大棵搖錢樹，仲要今次係國語歌。」仲話希望下次可以整個合作計劃都由佢哋自己話事。

三人接受訪問時問到係咪真係覺得自己係搖錢樹？阿Sa話：「係呀，我哋係三棵搖錢樹，合埋變成一棵百年老樹。」祖兒就話今年係閨蜜年：「年頭同阿Sa去完旅行，跟住合作拍廣告，到而家又有呢次嘅合作，冥冥中自有主宰，而且時間剛剛好。」阿Sa話大家合作其實講咗好多年，雖然中間都有合唱過一啲舊歌，但今次係全新創作。佢哋又形容大家性格唔同各有Style，但喺埋一齊就有好多默契，同好好嘅感覺。

講到日前有報道指阿嬌偷運男友賴弘國返屋企，阿嬌話：「光明正大幾時偷運呀？佢有手有腳識得自己行。」阿嬌透露男友工作忙，但係都盡量抽時間到香港陪佢：「都覺得好感動，佢做嘢好辛苦都特登過嚟，大家都想見面盡量維持感情。」問到有冇叫過男友考慮將醫務所搬嚟香港？阿嬌話：「我都有問過，但係佢話做唔到，你哋唔明㗎喇，唔係咁簡單。」

而早前阿Sa生日，問道麻雀館太子爺男友送咗咩禮物？佢話：「有送禮物不過唔講你知係咩，阿嬌送咗手袋，祖兒就送咗相機畀我。」阿嬌就話：「佢哋啲口味好奇怪，鍾意啲奇怪嘢。」咁係咪送咗隻麻雀畀你？佢笑話：「係呀上面寫住個Luck字。」旁邊嘅祖兒就搭嘴：「I Luck You呀？」

另外，講到謝霆鋒早前喺澳門示範廚藝嘅片段畀人網上瘋傳恥笑，連黃秋生、張敬軒都拍片抽水，祖兒表示：「我喺現場親眼睇到，我覺得佢煮嘢嘅時候睇進入忘我階段有自己Style，佢係Chef Lé Mon」阿Sa就話呢個為屬於霆鋒嘅挑戰：「Chokonic Challenge，每個Chef都有自己嘅獨特Style，會令人哋模仿。」阿嬌就話希望佢可以得到米芝蓮星級嘅榮譽。